Go ye not by Gallowa
Come bide a while, my frein
I'll tell ye o the dangers there –
Beware o Sawney Bean.
There's nae body kens that he bides there
For his face is seldom seen
But tae meet his eye is tae meet your fate
At the hands o Sawney Bean.
For Sawney he has taen a wife
And he's hungry bairns tae wean
And he's raised them up on the flesh o men
In the cave of Sawney Bean.
And Sawney has been well endowed
Wi daughters young and lean
And they a hae taen their faither's seed
In the cave o Sawney Bean.
An Sawney's sons are young an strong
And their blades are sharp and keen
Tae spill the blood o travellers
Wha meet wi Sawney Bean.
So if you ride frae there tae here
Be ye wary in between
Lest they catch your horse and spill your blood
In the cave o Sawney Bean
They'll hing ye ap an cut yer throat
An they'll pick yer carcass clean
An they'll yase yer banes tae quiet the weans
In the cave o Sawney Bean.
But fear ye not, oor Captain rides
On an errand o the Queen
And he carries the writ of fire and sword
For the head o Sawney Bean.
They've hung them high in Edinburgh toon
An likewise a their kin
An the wind blaws cauld on a their banes
An tae hell they a hae gaen.
